Ikigabane ca 41

Indoto za Farawoni

1 Haheze imyaka ibiri, Farawoni na we arota ahagaze ku nkombe y'uruzi Niri, 2 abona mu ruzi Niri havuyeyo inka indwi zihimbaye kandi zivyibushe, zihereza kurisha mu rufunzo. 3 Abona kandi izindi nka indwi mbi z'imiguta ziva mu ruzi Niri zizikurikira. Zihagarara hambavu y'iza mbere ku nkombe y'uruzi Niri. 4 Za nka indwi mbi z'imiguta zirya za zindi indwi zihimbaye kandi zivyibushe. Farawoni aca arikangura. 5 Asubiriye gusinzira, arota ubugira kabiri. Abona amahundo indwi ayangitse ku giti kimwe; yari yuzuye kandi ari meza. 6 Abona kandi inyuma z'ayo hameze ayandi mahundo indwi yahumbiranye kandi yarumbishijwe n'umuyaga wo mu buseruko. 7 Ayo mahundo yahumbiranye ayongobeza ya yandi indwi yuzuye kandi atengengeye. Farawoni aca arikangura asanga zari indoto. 8 Mu gitondo, yari afise umutima uhagaze. Atumako ba rumenyi bose bo mu Misiri n'abanyabwitonzi biwe bose. Farawoni abiganira indoto ziwe, yamara ntihagira uwushobora kuzirotorera Farawoni. 9 Ni ho rero wa mukuru w'abahereza ibinyobwa yabwira Farawoni ati: «Uyu musi ngira nibutse igicumuro canje. 10 Farawoni yarashavuriye abasuku biwe, araheza anshira mw'ibohero, mu nzu y'umukuru w'abarinzi twe n'umukuru w'abacumba imikate. 11 Hanyuma turotera icarimwe mw'ijoro rimwe, jewe na we, indoto z'umwumwe zikagira insobanuro zisangije. 12 Aho hantu, twari kumwe n'umusore w'Umuhebereyi, umusuku w'umukuru w'abarinzi. Twaramwiganiye ivyo twarose, arabiturotorera, umwe wese amushikira ku nsobanuro y'indoto ziwe. 13 Uko yabiturotoreye ni ko vyabaye: jewe, Farawoni yankomoreye ikibanza canje, uwundi aramunyongesha.»

Yozefu arotora indoto za Farawoni

14 Farawoni araheza atumako Yozefu, bamukura muri kwa kuzimu bihuta, arimosha, aca arahindura impuzu, yinjira kwa Farawoni. 15 Farawoni abwira Yozefu ati: «Nararose indoto, ariko nta washoboye kuzindotorera. Nkaba numvise bavuga ko wewe wumvise indoto uca uzirotora.» 16 Yozefu yishura Farawoni ati: «Si jewe, Imana ni Yo izotanga inyishu izanira amahoro Farawoni.» 17 Farawoni abwira Yozefu ati: «Narose mbona mpagaze ku nkombe y'uruzi Niri. 18 Mu ruzi Niri havayo inka indwi zivyibushe kandi ziteye igomwe. Zihereza kurisha mu rufunzo. 19 Mu nyuma y'izo havayo izindi nka indwi z'imiguta kandi mbi; sinari bwigere mbona inka mbi nk'izo mu gihugu cose ca Misiri. 20 Izo nka z'imiguta kandi mbi zirya za nka zivyibushe za mbere; 21 zishitse mu nda yazo, ntivyaboneka ko zazinjiyemwo, kuko ububi bwazo bwagumye nk'ubwa mbere. Nca ndikangura. 22 Ariko nsubira kurota, mbona amahundo indwi ayangitse ku giti kimwe, yari atengengeye kandi ari meza. 23 Mu nyuma y'ayo, hamera ayandi mahundo indwi yahumbiranye, anyunyutse kandi yarumbishijwe n'umuyaga wo mu buseruko. 24 Ayo mahundo indwi anyunyutse ayongobeza ya mahundo meza. Naravyiganiye ba rumenyi, ariko nta washoboye kubinsobanurira.» 25 Yozefu yishura Farawoni ati: «Indoto za Farawoni ni zimwe. Imana yamenyesheje Farawoni ico iza gukora: 26 inka indwi nziza, ni imyaka indwi; amahundo meza indwi, ni imyaka indwi. Ni indoto zimwe. 27 Inka indwi z'imiguta kandi mbi zasokorotse mu nyuma, ni imyaka indwi, be n'amahundo indwi yahumbiranye kandi yarumbishijwe n'umuyaga wo mu buseruko, izoba imyaka indwi y'ikigoyi. 28 Iryo ni ryo jambo nari mfise mbwira Farawoni; Imana yahishuriye Farawoni ico iza gukora. 29 Hagiye kuza imyaka indwi y'umusesekara mu gihugu cose ca Misiri. 30 Mu nyuma y'iyo hazoza imyaka indwi y'ikigoyi, agahimbo kose ko mu gihugu ca Misiri kibagirwe. Ico kigoyi kizoyogeza igihugu, 31 nta wuzoba akimenya agahimbo ico ari co mu gihugu kubera ikigoyi kizokurikira kizoba gikaze cane. 32 Izo ndoto nizaba zashikiye Farawoni kabiri, ni uko Imana yashinze iyo ngingo kandi ikaba igiye kuyirangura idatevye. 33 Ubu rero, Farawoni natore umuntu w'incabwenge kandi w'umunyabwitonzi, amushinge igihugu ca Misiri. 34 Farawoni nagene mu gihugu cose abantu batoza ica gatanu ku biri mu gihugu ca Misiri, mu myaka indwi y'umusesekara. 35 Bazokwegeranya ivyimburwa vyose vyo muri iyo myaka indwi myiza yimirije kuza, bimburire mu bisagara ingano bazorya, bazishingure, zigabwe na Farawoni. 36 Ivyo vyimburwa bizobera igihugu integabizoza muri iyo myaka indwi y'ikigoyi kizotera mu gihugu ca Misiri; gutyo igihugu ntikizoyogezwa n'ikigoyi.»

Yozefu ashikirizwa ubukuru ku kirimba kwa Farawoni

37 Iryo jambo riranezereza Farawoni n'abasavyi biwe bose. 38 Farawoni abwira abasavyi biwe ati: «Twokura hehe umuntu nk'uwu arimwo umutima w'Imana?» 39 Farawoni abwira Yozefu ati: «Ko Imana yakumenyesheje ivyo vyose, nta wundi muntu munganya ubwenge canke ubwitonzi. 40 Ni wewe uzotegeka urugo rwanje. Igihugu canje cose kizokurikiza amategeko yawe. Ico nzokurusha gusa ni intebe y'ubwami.» 41 Farawoni abwira Yozefu ati: «Ehe ndakugize mukuru mu gihugu cose ca Misiri.» 42 Akura impeta yari yambaye ku rutoke ayambika ku rutoke rwa Yozefu. Amwambika kandi impuzu ziremvye, amwambika mw'izosi igihete c'inzahabu. 43 Araheza amwuriza ku mukogote wiwe wa kabiri, aho aciye bagasemerera bati: «Nimupfukame.» Farawoni amushinga kugaba igihugu cose ca Misiri. 44 Araheza abwira Yozefu ati: «Ni jewe Farawoni. Mu gihugu cose ca Misiri, udategetse nta wuzokakaza ukuboko canke ukuguru.» 45 Farawoni araheza yita Yozefu, Tsafenati Pahene, yongera amushingira Asenati umukobwa wa Potifera, umuherezankuka wa Oni. Yozefu aca atangura kugendura igihugu cose ca Misiri. 46 Yozefu yari afise imyaka mirongo itatu igihe yatangura gukorera Farawoni, umwami wa Misiri. Hanyuma Yozefu yikebanura Farawoni, aja kugendura igihugu cose ca Misiri. 47 Muri ya myaka indwi y'umusesekara, haba umwimbu mwinshi mu gihugu. 48 Yozefu yegeranya ivyimburwa vyose vy'iyo myaka indwi vyari mu gihugu ca Misiri, yegeraniriza ibifungurwa mu bisagara; ivyimburwa vy'imirima yari ikikije igisagara cose akavyimburira muri co. 49 Yozefu arunda ingano zingana n'umusenyi wo ku kiyaga; ziba nyinshi ku buryo areka n'ukuziharura, kuko ntizagira igitigiri. 50 Imbere y'umwaka ikigoyi gitera, Yozefu avyara abahungu babiri kuri Asenati, umukobwa wa Potifera, umuherezankuka wa Oni. 51 Imfura ayita Manase, avuga ati: «Ni uko Imana yanyibagije imiruho yanje yose n'urugo rwose rwa data.» 52 Uw'ubuheta amwita Efurayimu, avuga ati: «Ni uko Imana yampaye kurondokera mu gihugu nagorewemwo.» 53 Ya myaka indwi y'umusesekara mu gihugu ca Misiri irarangira. 54 Imyaka indwi y'ikigoyi na yo iratangura nk'uko Yozefu yari yabivuze. Ikigoyi kirakwira mu bihugu vyose, ariko mu gihugu ca Misiri cose hoho hariho ivyokurya. 55 Igihugu cose ca Misiri kirahava kirasonza, abantu batakambira Farawoni ngo abahe ivyokurya. Farawoni abwira igihugu cose ca Misiri ati: «Nimugende kwa Yozefu, ico aza kubabwira cose, mugikore.» 56 Amapfa yari yakwiye mu gihugu cose. Yozefu na we yugurura ibigega vyose, agurisha ingano ku Banyamisiri. Ariko amapfa aguma arushiriza mu gihugu ca Misiri. 57 Ibihugu vyose bishikukira mu Misiri gusuma ingano kwa Yozefu, kuko amapfa yaguma yongerekana kw'isi yose.